العالم الاقتصادي الأمريكي ويليام نوردهاوس اشون حصل على جائزة نوبل للاقتصاد سنة ٢٠١٨؟
حصل عليها لأنه نمذج اثار التغير المناخي مثل زيادة درجات الحرارة والفيضانات في التحليل الاقتصادي على المدى الطويل وهذا واضح بأبحاثه من عامة ١٩٩٥ والموديل اللي سوا (GCAM) واللي لحد الان مستخدم من قبل اعلى لجنة دولية للتغير المناخي IPCC.
يعني ببساطة، اثار التغير المناخي تكون أكبر على كوكب الأرض كلما اقتربنا من المستقبل بسبب زيادة تراكم الانبعاثات في الجو، وبالتالي لازم تتوقع الأضرار الاقتصادية الكلية الناجمة عن تغير المناخ من الان وتقارنها بسعر تخفيف تلك الأضرار وأثر هالشي على الاقتصاد وهذا معروف في الاقتصاد عند تحليل التكلفة والفائدة او حساب الNet Present Value .
مثلا، يُتوقع ان الكلفة الكلية على الاقتصاد العالمي نتيجة لأثار التغير المناخي هي ٣٨ تريليون دولار امريكي بحلول ٢٠٥٠ …وبالتالي فقدان أكثر منم ١٧٪ من الناتج المحلي الإجمالي العالمي … هاي ال٣٨ تريليون دولار تتضمن مثلا الكلفة الاجتماعية نتيجة للأمراض والوفيات بسبب ارتفاع درجة الحرارة والفيضانات وموجات الحر وارتفاع مستوى سطح البحر والكوارث البيئة الأخرى … وأيضا تتضمن قلة الإنتاجية نتيجة للكوارث البيئية وتعطيل الدوام والكلفة الناتجة عن صيانة وتجديد البنى التحتية.
كلفة هذه الأضرار المناخية لما تقارنها بالمشاريع اللي لازم تسويها من الان وبالمستقبل القريب حتى تقلل هاي الاضرار تطلع لك أكبر بكثير من كلفة المشاريع (لتخفيف والتكيف مع التغير المناخي). ولا يوجد عالم او باحث معتبر يقول عكس هذا الشيء على الاطلاق. نُشر بحث جديد في سنة ٢٠٢٤ في مجلة Nature المرموقة بعد مراجعة بيانات اكثر من ١٦٠٠ منطقة عالميا خلال ال٤٠ سنة الأخيرة ووجدوا ان الأضرار الناتجة بسبب تغير درجات الحرارة وهطول الأمطار راح يقلل الدخل العالمي بنسة ١٩٪ خلال ال٢٦ سنة القادمة وهذا يعني انه الاضرار الاقتصادية الناتجة عن الاحتباس الحراري وزيادة درجة الحرارة أكثر من ٢ مئوية يفوق مشاريع تقليل الانبعاثات والتكيف.
هسة يجي واحد يكول: شنو يعني هي ١-٢ درجة حرارة زيادة عادي نتحملها بدل ما بغداد درجة حرارتها ٥٠ تصير ٥٢ عادي … بس الشغلة مو زيادة خطية … الزيادة ١ درجة عن الطبيعي يعني أضرار أكثر ي١٠ مرات وزيادة ٢ درجة يعني أضرار اكثر ب ١٠٠ مرة ! يعني الشغلة مو علاقة خطية.
زين والعراق اشون؟
احنا مو مسؤولين عن التغير المناخي مقارنة بالدول الصناعية الكبرى بس احنا من أكثر المتضررين منه بسبب موقعنا الجغرافي وغياب التخطيط المستدام وأسباب أخرى. بس لا توجد أي دراسة عراقية معتبرة مع بيانات تتناول اثار التغير المناخي على الاقتصاد العراقي وعلى قطاعاته (الطاقة – الأرض – البيئة – الخ ) ببساطة لان ما عدنا مودلات او نماذج للتقييم المتكامل مثل كل الدول. السعودية والكويت والأردن وتركيا وكل دول ومؤسسات العالم لديهم نماذج تقييم متكامل لكل القطاعات تساعدهم على رسم سياسات وسيناريوهات متوقعة لحالة بلدانهم نتيجة لاثار التغير المناخي وكيف سيؤثر هذا على الاقتصاد.
ابحث هسة بالكوكل شكد كلفة اثار التغير المناخي على باكستان نتيجة للفيضانات الأخيرة راح يطلع لك رقم: ١٥ مليار دولار … ابحث عن العراق: كل شي ما يطلع !
سمعت مؤخرا انه الحكومة العراقية تطالب بالأولوية بالتمويل نتيجة لاضرار التغير المناخي …بس المجتمع الدولي يريد أدلة علمية وسيناريوهات ونمذجة واثبات علمي انه فعلا التغير المناخي يأثر على العراق حتى يطالب بيها نتيجة للخسائر والاضرار فهمة ما راح ينطوك الأولوية اذا ما تثبت انت تستحق الأولوية !!
ولذلك احنا بأشد الحاجة إلى رؤية مؤسساتية شاملة تتبنى النماذج او المودلات العلمية لتقييم اثار التغير المناخي عبر مختلف القطاعات: المياه، الطاقة وربطها بالاقتصاد … هاي النماذج او الموديلات يسموها نماذج التقييم المتكامل Integrated Assessment Models تتيح لك ان تشوف كلف تقليل التغير المناخي على قطاعاتك بالعراق وشنو المشاريع اللي تسويها الان وتنطيك أكبر منفعة بالمستقبل …
يعني مثلا: يجوز الدولة عدها 20 مليون دولار وتريد تقرر ان تحمي سكان محافظة بغداد من زيادة تأثير درجة الحرارة … اشون تقرر وين تصرف هاي الأموال؟ بقطاع الكهرباء مثلا لتوفير كهرباء اكثر تخليهم يشغلون المكيفات؟ لو بقطاع المياه حتى توفر ماء صالح أكثر لو وين؟ الموديلات والنمذجة تساعدك ان تقرر وين … اخوان انتهى زمن تشكيل لجان وتقرر بدون علم وأدلة… ولذلك احنا بالمملكة المتحدة وصلنا الى وضع سياسات الان لمعالجة اثار تغير المناخ سنة 2043 ! باستخدام هذه النماذج العلمية .
